Магистральдық теміржол желісі және локомотивтік тарту қызметтеріне тарифтерге төмендету индексін қолдану туралы

2026 жылғы 27 маусымнан бастап «Қазақстан темір жолы» ҰК» АҚ магистральдық теміржол желісі және локомотивтік тарту қызметтеріне тарифтерге 70% жеңілдік көздейтін 0,3 төмендету индексін қолданады. Бұл индекс республикаішілік қатынаста әлеуметтік маңызы бар азық-түлік тауарларын, сондай-ақ отандық ұн тарту және нан пісіру кәсіпорындарының атына бидай тасымалдау кезінде қолданылады.

Аталған шара Қазақстан Республикасы Үкіметінің 2026 жылғы 10 маусымдағы № 485 қаулысымен бекітілген 2026–2029 жылдарға арналған халықтың табысын арттыру жөніндегі кешенді жоспар шеңберінде іске асырылып отыр және халық үшін азық-түлік бағасын төмендетуге әрі азық-түлік инфляциясын тежеуге бағытталған.

Төмендету индексі бидайды (ЕТСНГ коды 011005) мынадай межелі бекеттерге тасымалдауға қолданылады: Атырау, Бейнеу, Ақтау-Порт, Белес, Жилаево, Қызылорда, Қарағанды, Жезқазған, Қостанай, Петропавл, Ақтөбе-1, Астана-1, Атбасар, Павлодар, Түркістан, Шымкент, Алматы-1, Іле, Талдықорған, Шамалған, Тараз, Семей және Өскемен.

«Астық Транс» АҚ көптеген жыл бойы республикаішілік бағыттарда астық тасығыш вагондарды ұсыну үшін ең төменгі мөлшерлемелерді қолдана отырып, отандық ұн тарту кәсіпорындарына қолдау көрсетіп келеді. Осылайша, компания көлік жүктемесін азайтуға және отандық өңдеушілердің тұрақты жұмысын қамтамасыз етуге ықпал етуде.

Отандық өңдеушілерге түсетін көлік жүктемесін төмендету жөніндегі «Қазақстан темір жолы» ҰК» АҚ бастамасын қолдау мақсатында «Астық Транс» АҚ белгіленген бағыттар бойынша бидай тасымалдау кезінде астық тасығыш вагондарды ұсынуға қолданыстағы мөлшерлемелерді сақтайды.

Төмендету индексін қолдану және астық тасығыш вагондарды ұсынуға қолданыстағы мөлшерлемелерді сақтау нәтижесінде теміржол тасымалының жиынтық құны тасымалдау қашықтығына қарай 15–40%-ға төмендейді.